Church guide

Zinglei pumh

Zanlei pumh

TTHANGHPHAWKNAK PROGRAM AH SAWMNAK Miphun hawi hna, Khrifabu hna, Chungkhar hna, Bawipa min in nan kut kan tlaih hna. Chinland Thantlang ah ngaktah zohkhenhnak in Pathian nih kum saupi a hman cangmi Rev. Dr. J. No Mang cu nihin hi Indianapolis a hong phan ve. Amah hi mi tampi nih kan hngalh cangmi, Pathian nih khuaruahhar in rian a hrawmmi pa a si. Hi bantuk hmuhsung tonhar kan pa a hong phanh khawh caah Pathian zong kan thangthat i, thlaraulei tthanghphawknak program zong a tanglei bantuk in tuah kan timh caah pello tein nan rak i tel ve nak lai Bawi Khrih min in kan in sawm hna. A Ni ..................... July 17 - 20, 2019 (Wednesday -Saturday) A Caan ................ 7:00 - 9:00 PM A Hmun ............... Chin Evangelical Baptist Church 5610 South Meridian St Indianapolis, IN 46217 Bawipa lei ah kar hlan khawh i zuam hna u sih. BAWIPA HI ZEITLUK IN DAH A TTHAT TI KHA NANMAH TEIN VA KAWL CIO HMANH U...(Salm 34:8a) Rak tel khawh i zuam hrimhrim. Thlaraulei hlawknak nan hmuh hrimhrim ko lai. Khrih min in, Thawngling Mualhlun Senior Pastor (317)7973809

https://youtu.be/eb2rGcN1pYg

Zanlei pumh ( Mission Department )

Zinglei pumh Mission Department

THARCHUAHNAK CU RAWL TUAN BAWMTU MURU A SI Johan 4:35 Rawl cu an hmin dih cang i, ṭuan an cu diam cang. Ule nau, nihin USA ram kan zohtik ah Sehtan nih a phunphun in rian a ṭuan tihi fiang tein a lang. Pumpak le chungkhar chung ramri hmete chung lawng ah siti lo in ram pumpi dirhmun zong in, cozah uktu nawlngeihnak chung zong in a lang cuahmah. Culawng silo, vawlei khuazakip kan cuanh tik zong ah Sehtan cawlcanghnak hi a langsaar ngaimi a si peng rih ko tihi a fiang. Hi lio caan ah zumtu pumpak le chungkhar, a buu cio zong nih kan rian taktak a simi hi kan tlolh sualnak hnga lo, rawl ṭuan a cut tuknak kong cu hon nolh ṭhan ka duh ko rih. Kan hnulei kum 200 (July 13, 1813) renglo deuh ah Kawlram rawl ṭuan ah a rak ra mi siangbawi Adoniram Judson (1788-1850) kong ruah tik ah tharchuahnak cu rawl tuan bawmtu muru a si zia a lang ngaingai. Amah hi pastor fapa a si i, college a kai tiang cu zumtu cazin ah ai telmi a si. Sihmanhsehlaw college a phanh tik ah zumlotu ah ai chuah. A hawipa Jacob Eames hi mifim ngai, Pathian bia lo mi a rak si i, Jacob cawnpiaknak nih a rak chilh ngai caah zumlo tu ah ai chuahnak a si. College a dih tik ah New York khualei ah rian kawl ah a kal i, a duhning in rian a hmuh khawhlo caah inn lei ah a hong kir ṭhan. An khua a phanh hlan lampi hotel hmete ah a riak. Khaan khat te lawng a lawng i, cu khaan te ahcun a riak ve. Asi nain zan khuadei te a pawng khaan i a ummi pa, a zawt a zual ngaimi ruang ah aa hngilh kho lo. Mizaw pa cu a hrum, a ai caah pawngkam tiang in hngilh kho lo in a tuah hna. Judson nih hi pa hi a thi sual hnga maw?, thih teh ai redi hnga maw? ti a ruat. Hi pa hi sining law thih hi kai redi ve hnga maw ti a ruat fawn. Asi nain college kai lio ka hawipa Jacob nih tah zeitindah a hei ruah ve hnga? Hi bantuk ruahnak ṭuktak hna cu tiah a ka ti hnga i, a ka nihsawh men hnga tiah a ruat fawn. Cuti cun zankhua a dei. Zinglei ai thawh pah ah hotel ngeitu pa cu riahman phaisa pek pah in nizan zan a zaw mi pa kha zeidah a lawh? Hodah a si e? tiah a hei hal cu, hotel ngeitu pa nih, mah pa kha nizan zan ah a thi cang. Aw.. amin cu Jacob Eames timi pa Brown University in a chuakmi minthang ngai mi pa kha a si e, a ti. Cu thawng theih cun Judson cu a lau taktak. Cu hlei ah a nunnak kong ah khua fakpi in a ruahter fawn. Lampi ah zeican a rauh i, Inn i a nule pa sin a phanh hmanh ai thei manh lo. Cu hrawng lio a ruahpeng mi cu, a hawikom ṭha a rak simi Jacob bak a riahnak hotel amah khaan kam te i a thihmi hi aa tongsual mi a si lai lo, tihi a si. A hringtu a pa nih a cawnpiak lengmang mi Pathian nih a sersiam mi a si lai tiah a lung a hong fim i, cu hrawng cun Baibal chung Pathian hi Judson nun ah a tak in a hong lang chin lengmang. Thiang Thlarau nih a nun ah rian a ṭuan ciammam i, Bible sianginn kai duhnak hna a hon ngei. Cuti cun Pathian riantuantu, siangbawi in Kawlram tiang ah a hong phanhnak a si. Kawlram lawng hmanh silo in vawleicung siangbawi riantuannak ahcun hngalh ngaingai mi pakhat ah a hong cang ve. Adoniram Judson cu tharchuahnak a ngei bakmi a si caah Kawlram i a riantuannak zong ah Pathian aa phuang i, thluachuah a pek khunnak a si. A chimmi cu, ‘ka nunnak cu zeitindah Bawipa duhning in ka hman cang lai ti lawng hi ka ruah khawhmi a si e,’ a ti. Ule nau, facang ṭuan kong khi a chimthiam mi te nih an kan chimh ahcun lung a lut ngai ve. Asi nain kaa lawng in a ṭuannak kong chim lengmang lio ah facang tlol dih a fawi te. Kaa chimnak lawng in cun theory sawhsawh a si lai i, a taktak cu a phan kho lo. Rian aa ṭuan kho lo i, aa lim kho fawn lo. Facang ṭuan timi cu lo ah kal i, retheih laak ve i, thlanhri pi chuak in cawlcangh ve i, biatak va chuah ve tu kha a rak si. Cu bantuk in cawlcangh hnu lawng ah rawl cu aa ṭuan kho. Thlaraulei rawl ṭuan zong hiti ning te a si ko. Kaa lawng in pulpit cung lawng in ṭuan khawh phun a si lo. Biakinn chung lawng in ṭuan khawh phun a si lo. Bawipa hmai ah khupbil ve i, mitthli thlak ve i, ṭah hnawh ve i, taksa thinlung thlarau dihlak he i tharchuah ve hnu lawng ah thlarau tlau tlaihnak lamthluan zawh khawh a si. Bawipa hmai ah mahle mah i tharchuah ve bak kan herh. Kan i tharchuah lo ahcun thlarau zawnruahnak ngeih khawh a si lo. Amen. Vawleicung ramthar riantuannak kan zohtik ah aa tharchuahmi hna lawng hi Bawipa nih hleice in a hman khunmi hna an si. Siangbawi rian tuannak ah, pastor riantuannak ah, Evangelist le Pathian rian a phunphun in tuannak kan zohtik ah aa tharchuahmi hna cu hman an si i, tharchuahlo mi hna cu hmanlo an si ve ko. Ule nau, nihin ah hin thlaraulei ṭhanghnak kan herh. Thlarau tlau mi hna zawnruahnak kan herh tuk. Cucaah kan i tharchuah a herhtuknak a si. Kan pawngkam ah thlaraulei hrinṭhannak, ṭhanghnak kan hmuhkhawh nak hnga i tharchuah kan herh. Miphun dihlak, ram pumpi dihlak ṭhanghnak vialte hi pumpak i tharchuahnak lawng in ai thok kho mi a si. Pathian nih tamdeuh in a rian a kan hrawm khawh ve nak hnga i tharchuah kan herh fawn i, Bawipa Pathian he naih deuh in umkhawhnak ding ah i tharchuah ṭhiamthiam kan herh. Amen. CUN, AI THARCHUAH TAKTAK MI CU MIDANG THLARAU ZAWNRUAHNAK AN NGEI. Zeicahtiah THARCHUAHNAK CU RAWL ṬUAN BAWMTU A SI CAAH. Bawipa nih sunparnak co ko sehlaw kan dihlak caah tharchuahnak lam kan pemh ter ko seh. Amen. Khrih ah nan hawi, Thawngling Mualhlun CEBC Indianapolis July 9, 2019

Kan fale ṭhal chung Pathian Bia le Mission, Laica, Lai Nunphung le Tuanbia, Mipi he i pehtlaihning, Kanan le Zaangleknak cawnnak kan thok. Zarh hnih chung peh a si lai caah thlacamnak in kan bawm uh law.

Zaanlei pumh

Zinglei pumh

GETSAMANE SANG (ZANLEI PUMH)

Calvary Sang caanhmannak (Zinglei pumh)

July 7, 2019 Bawipa Ni Caanhmannak Miphun hawi hna, Bawipa thawng in July thla a zarh khatnak kan phan kho hna. Tu zarh zong A mithiang hna he Amah thang’hat ding ah rak chuak cio ding in kan in sawm hna. Tu zarh cu Bawipa zaanriah kan hmang lai. Cun, zing lei ah The Second Lady of The Union of Burma Dr. Anna Sui Hluan zong biatawi chimnak a kan ngeih lai. * Zinglei Pumhnak * Pumh caan: 9:30am-12:00pm * Thawngtthachim: Rev. Dr. Thawngling Mualhlun * Bible cangthim: Deuteronomy 8:3 * Tlangtaar: Pathian Bia Cu Rawltak A Si * Zaanlei Pumhnak * Pumh caan: 2:30pm-5:00pm * Thawngtthachim: Rev. Dr. Thawngling Mualhlun * Bible cangthim: Deuteronomy 8:3 * Tlangtaar: Pathian Bia Cu Rawltak A Si Bawipa nih sunparnak co ko seh!!!

Kan Khrihfabu chung in kan mino a simi Salai Harmon Bawi Tha Lian nih Chin Youth Of The Year a kan hmuhpiak caah kan lawmhpi! Bawipa nih a sunparnak caah hmang chin ko seh. Chin mino hna nih zohchunhtlaak taktak pasal ttha kan i ngeihmi a si.

Zaanlei pumh

Zinglei pumh

Bethsaida Sang (Zanlei pumh)

Shalom sang

RAWL CU ṬUAN AN CU DIAM CANG! Johan 4:35 ‘Nan nih nih hi hnu thlali ah rawl ṭuan a cu lai nan ti a si lo mei? Sihmanhsehlaw lo khi ṭha tein hei zoh hna hmanh u; rawl cu an hmin dih cang i, ṭuan an cu diam cang’ Ule nau, Tuzing ka thawh ka in kai halmi cu, ziah kei hi hell ah ka um lo? ti hi a si I, ka hon fianmi cu, …Aw.. midang nih pei hell kalnak lam an ka phihpiak caah a si ko hi ti a si. Midang nih Jesuh Khrih khamhnak thawngṭha an ka chimh i, ka cohlan caah ka nun ve nak a si ko tizong kai fiang chih. Chun deuh a hong phan i, bia kai hal ṭhanmi cu, a si ah ka u ka nau, ka chungkhar, ka miphun le mi vialte hi teh hell kal ding cu ka siang ve hna hnga maw, ti a si hoi. Cu nih cun a ka hlauh. Fiangdeuh ka chim ahcun, cu bia kai halnak nih cun ka thlarau a hlauh ṭhan ve. Midang nih nunnak lam an ka hmuhsak bantuk in midang sin ah nunnak lam a phuang dingmi ka si ve timi kha ka thinlung chung ah fakpi in a hon ka sawh ve. Unau hawile, hi thawngṭha na rel pah ahhin cu bia cu rak i hal ve hmanh. Zeitindah nunnak na hmuh kha? Nihin hell i na tlaklo nak kha zeiruang ah dah a si kha? Ṭha tein i ruat hmanh. Lungfim tein ruat hmanh. Cun pahnihnak biahalnak kha i hal rih hmanh. Midang zong hell ah tlakter cu kan duhpiak hna hnga hme maw? Zeitluk i kan remlo mi pa zong kha, kan remlo minu zong kha, huat a tlai tuk kan timi zong kha hell taktak tlakter cu kan duh hna hnga hme maw? Cuti kan duhpiak taktak ṭung hna lo ah ziah kan ṭhut sawhsawh ko ne. Ziah, mahkel mahbon cu kan si rih ko ne? timi hi kan i hal ve hrimhrim dingmi cu a si. Asi nain mifim hna bia bang, chimnak in tuahnak a thawng a thang deuh timi bia cu hohmanh nih kan lonh khawhlo mi a rak si. Midang zong hell tlak taktak kan sian tak hna le siantak hna lo cu kan tuahsernak nih a langhter lai ti a si ko. Amen. American ram Mino le Hngakchia Humhimtu Bu nih kum 2012 ah an chuahning ahcun, Nifa tein kum 25 tang pakhat paoh HIV zawtnak in an thi. Nifa tein kum 20 tang minung 5 lengmang mahle mah an i that. Nifa tein kum 20 tang mino 9 lengmang midang thah an tong. Nifa tein kum 20 tang mino 34 lengmang accident tonnak in an thi… Nifa tein mino 180 lengmang puarhran ruang ah tlaih an tong. Nifa tein mino 367 lengmang rithmang din ruang ah tlaih an tong. Nifa tein mino 437 lengmang zurit bu in mawtaw an khalh (DUI) caah tlaih an tong. Nifa tein mino 2861 lengmang sianginn kainak in an i phuak. Nifa tein mino 3288 lengmang inn in an zaam… Nifa tein mino 4248 lengmang thonginn an phan. Nifa tein mino 7883 lengmang tihram le hlawt an tong. Nifa tein mino 17297 lengmang sianginn chuah an tong. Kumchiar tein 1 million naute cu nule pawchung ah thah an tong. Nikum (2018) ah mino 116000 cu thong inn ah an phan nain tipil a ingmi cu thong tlawmpal te lawng an si. Cauk pakhat nih a ttialmi ahcun, tukum ram pumpi tipil a ingmi mino pawl nak in mawtaw accident in a thimi Pathian hngallo mino an tam deuh vingvan e, a ti. Hihi tulio kan umnak American hmanthlak cheukhat cu a si… Thawngtha chimtu pakhat nih a chimmi cu, American thawngtha chimtu hna biafang ah sual ngaihchihnak le hell kong chim cu a um set ti lo e, a ti. Sual ngaihchihnak le Hell biafang cu chanthar Khrifa zumhnak chung in a lo chin lengmang ko. Khrih kan zumh ahcun kan rum lai, kan dam lai, kan tluang lai, kan ṭhangcho lai timi lawng nih kan thawngṭha hi a khuh dih cang. Kanmah miphun Khrifabu tampi zong ah culei deuh a hoihmi kan um len caah ruahchih ngaingai kan herhnak a si. Kawlram in kan zoh rih a si ahcun, 2014 milurelnak ning in cun 6.2% lawng Khrihfa kan si rih. Million 52 renglo chung ah Jesuh a zummi cu 3.2 million kan si. Million 49 hrawng hi Pathian hngallo in an um rih. Kan Chinmi chung zong ah thong tampi nih Pathian an hngal kho rih lo. Kan rian a tam ve ning hi ruat ve tuah law. Vawlei pi in tuak rih hmanh u sih. Kan hnulei zong ah ka chim bal cang. Million 7500 chung ah Khrifa minpu cu million 2400 hrawng lawng kan si rih. Minpu chung hmanh ah a tlaumi an tampi rih va si kaw, a tam deuh u cu hell ah an kal cuahmah ko. Hi mi vialte hi hi hnu kum 150 chung ah vawlei in kan chuak dih te lai, Bawipa Jesuh a rat ṭhan rihlo ahcun. Hi vialte lak ah a tam deuh cu hell ah an kal dih te lai ti cu a fiang ngaingai mi a si. Unau hawile hna, ṭial cawk a si hnga maw? Rawl cu an hmin dih cang i, ṭuan an cu diam cang timi hi a diktuk mi a si. Vawlei pumpi in kan zohtik zong ah a dik, kan umnak ram cio le miphun in kan zohtik zong ah a dik, kan pawngkam le a sining zohtik zong ah a dik bak mi an si. Cucaah nihin hi thut sawhsawh can a si ti lo… Luka 16: 19 in kan zohtik ah mirum pa le Lazaruh kong kan hmuh. Hi chung i hremnak le harnak kong kha silo in ahme 27 le 28 kha zohhmanh u, zeitluk in dah thlarau tlau tlaih a herhzia a kan fianternak a si. ‘Cun mirumpa nih cun a thawh i, Asi, ka pa, Lazaruh cu ka pa inn ah khan hun thlah ko, cuka ahcun chuahpi unau panga ka ngei hna i hung kal sehlaw annih tal cu hi nganfah innak hmun ah hin an rat nak hngalo ralrinnak hung pe hna seh, a ti’. Zungzal hrum-ainak ṭih a nun zia ai fiang, amah caah cun a hnutuk cang ti zong ai fiang, cucaah a nungrih mi a naule panga caah siaherhnak nganpi a ngei. A chungkhar caah zawnruahnak nganpi a ngei i, amah bantuk in an i palh ve nak hnga lo, an tuarnak hnga lo a nawlnak a si. Ule nau, kan chungkhar chung cio ah, kan sahlawh chung cio ah, kan hawikom le naihniam lak ah hin zungzal nunnak he pehtlai in a fianglo mi kan um lengluang ko e. Cucaah zingzan in ai manh thiam ding kan si hrimhrim lo. A caan a um lio te ah kan chimh ve hna, kan hruai ve hna, kan nawlpiak ve hna a herh ngaingai ko. A daithlang ngam ding kan si hrimhrim lo. Hell ah tla taktak hna sehlaw aa chirtuk ding cu kan mah pei kan si cu. Cucaah a caan a um chung te ahhin zumtu hna, daithlang hlah u sih. Amen. Salvation Army hruaitu William Booth nih cun, hell kawtka tiang hei kal khawh khi sisehlaw, kan pastor vialte hi kan hei thlah ta hna hnga i, an hong kirlei ahcun zeitluk in dek thlarau tlau tlaitu ṭha ah an i chuah hnga, tiah a rak ti. Hell a um ka zumh ko tiah kaa in chim ttung i tuahsernak in thlarau tlau pakhat tal caah a cawllo mi cu zumh an har taktak ko. Nikhat a chuak le vawlei camahca lawng, zarhkhat a chuak le mahca lawng, thlakhat a chuak le mahca lawng nih cun zeitindah midang thlarau cu a tlaih khawh rua hnga mu! Hell kong kan ruah deuhdeuh tik ah midang zawnruahnak le dawtnak a chuak chinchin. Moses kha zohhmanh. Israel mi an sual deuhdeuh ko nain, a hlaw siang hrim hna lo i, a dawtnak tu hna a langhter deuhdeuh. Cucaah Bawipa sin tu ah a nawlpiak peng hna. ‘Asi nain an sualnak cu ngaithiam ko sawh hna. Cun na ngaihthiam khawh hna lo a si le nangmah nih na ttialmi cauk chung khan keimah ka min tu kha hlo ko, a ti’ (Exodus 32:32) Haleluia! Moses uar a umtuknak cu hi zawn hi a si bik. Midang thlarau nunnak caah amah nunnak hmanh hloh a ngamhmi, hloh sawhsawh silo in Pathian tialmi min cazin chung hmanh in ka hnawt ko a ti ngamtu a si. Pastor Adrian Rogers nih cun, kan dihlak in sermon petu kan si kho lai lo nain midang thlarau tlaitu cu kan si kho dih, a ti. Asi, a hman tuk. Kan dihlak in sermon kan phuang kho lai lo nain nunnak in thlarau tlaitu cu kan si kho dih. Pathian nih hin kan dihlak in chimtu siding hi a kan fial lo cu. Phuangtu, cawlcangtu si ding lawng a kan fiallo. Zeite khi dek a kan fial cio ko i, a kan fial hnuhnu cu a kan fial ning in nunpi ve kan herh ko. Bawipa nih a kan duhpiakmi taktak cu lam khatkhat in a tehte siding hi a rak si. ‘Jesuh nih cun a thawh hna i, ka Pa nih amah nawlngeihnak chung ah a chiahmi caan le nithla kong cu nan nih hngalh awk a herh lo. Asi nain Thiang Thlarau nan cung i a tlun tik ahcun, tthawnnak in nan khat lai i, Jerusalem khau le Judea ram vialte le Samaria ram ah le vawlei cung khuazakip ah ka TEHTE nan si lai, tiah a ti hna’ (Lamkaltu 1:7,8) Amen. Pathian bia nih a kan chimhmi cu, khrifa kan hong si ahkhan cawtu kan ngei i, Pathian nih a Fapa Jesuh thisen in a kan cawkmi kan si. ‘Nan nih cu nanmah ta nan si lo, Pathian ta nan si; a man in cawkmi nan si. Cucaah nan pum cu Pathian sunparnak caah hmang u’ (1 Korin 6:19, 20). A kan cawk cang caah a sal riantuan in ṭemchihmi kan si cang, a lo chung ah facang phal a zundingmi kan si. Cuti cun midang kha hell tla lo ding in kan khamh khawh hna lai. Amen. Thawngtha chim awk kan ngei dih. Kei zong ka ngei ve, nang zong na ngei ve. Jesuh nih a kan dawtnak kong chim awk kan ngei dih. Thisen man chim awk kan ngei dih. Chim awk ka ngei lo na ti a si ahcun khrifa na si rih lo bia tu a si lai. Zumtu cu chim awk kan ngei, midang cheuh awk kan ngei. Minung thong tamtuk hell i tlak lo ding in a khamh khotu Jesuh kong chim awk kan ngei dih. Haleluia! Kan chungkhar he kan i ton tik ah, kan hawinu pa he kan i ton tik ah, kan rem setlo mi hna he kan i ton tik ah, kan huat ngaimi hna he kan i ton tik ah, kan ralpa he kan i ton tik ah … cu mi vialte cu hell ah zungzal in hrum-ai hna seh ti cu kan duhpiak taktak hna in kan siang taktak hna lai maw? Zumtu hna, biatak in i hal tuah u sih. Ule nau, Khrifa kan si ruang ah zungzal nunnak kong le zungzal hrum ainak kong kan hngalh. Cu hrum ainak hrial khawhnak lam zong kan hngalh fawn. Zeidah kan tuah lai? Kan hngalh ko bu in kan chim lo ahcun an thisen cu kan lu cung ah a tla lai. Cucaah nihin in rak thok ve ko. Mibu pi sin zong in thok lem hlah. Pakhat tein thok ve ko. Pakhat hnu pakhat tu in i zul hna seh. Bawipa bia nih tuanvo a lak ko hna lai. Bawipa Thlarau nih ṭuanvo a lak ko hna lai. Nunnak tu in langhter ko u sih. Thlacamnak tein rak thok ve ko. A tlaumi thlarau tlau pakhat inn a hong tlun ahcun vancung ah lawmhnak in a khat. ‘…aa ngaichihmi misual pakhat ruang ah vancung khua ah lunglawmhnak tamdeuh a um lai, tiah a ti’ (Luka 15:7) Pakhat nih pakhat hon hruai ve seh. ‘Vailamtah hram kan phakpi mi thlarau vialte, kan hmuhmi tuufa vialte hna hi, kan suiluchin dawhtertu cu an si te lai’ (Hla#440 vs. 3) Haleluia! Pakhat nih pakhat hon hruai ve seh. Bawipa nih mi tam deuh hi cu thongnga cawm ding ah a kan fial lem lo. Bawipa nih mi tam deuh hi cu thong tampi hruai ding ah a kan fial lem lo. Bawipa nih pakhat nih pakhat hon hruai ve seh tihi a kan duhpiak mi, a kan forhmi, a kan fialmi a si. I sehchih hmanh, Thiang Thlarau nih a kan hman lai i a ra hrimhrim lai. Kumkhat thlarau pakhat a za ko e, ule nau aw. I sehchih hmanh. Thlarau pakhat te hi a za hringhran ko e. Mi tampi cu RAWL CU TUAN AN CU DIAM CANG timi hi kan hngal lo i, kum 50 zong kan phan cang nain thlarau tlau pakhat hmanh kanmah hmang in Bawipa nih a hruai hna lo cu. Unau, kan ruat bal maw? kan nupile hna hi khoika dah zungzal caan an hman lai? Kan vale hna hi khoika dah zungzal caan an hman lai? Kan fale hna hi khoika ah dah zungzal caan an hman lai? Kan dawtmi hna hi khoikadah zungzal caan an hman lai? Kan miphun hawi hna hi khoika dah zungzal caan an hman lai? Kan minung hawi tampi hi khoika dah zungzal caan an hman lai? Luka 16 chung hell tlami Mirumpa kha kan pa sisehlaw, kan nu sisehlaw, kan fapa, kan fanu sisehlaw, kan nungak, kan tlangval sisehlaw kan miphun hawi siseh law kan sia a rem kho taktak ko hnga maw? Rem kho hlah! Cucaah Khamh khotu Bawipa sin ah hruai hna u sih. Nang le kei rian cu Bawipa kha midang sin theihternak tuah tu kha a si ko. Pakhat nih pakhat hruai seh. Pakhat nih pakhat hruai ko seh. Amen. Ule nau, Lo khi ṭha tein hei zoh hna hmanh, RAWL CU AN HMIN DIH CANG I ṬUAN AN CU TUK CANG DAH KAW!!!!! Khrih ah nan hawi, Thawngling Mualhlun CEBC Indianapolis June 25, 2019

Summer School Sawmnak. Nu le pa hna kan fa le kai ter khawh i zuam cio hna u sih

Zanlei pumh ( Mission Department )

Zinglei pumh Mission Department

GETSAMANE SANG (ZANLEI PUMH)

Calvary Sang caanhmannak (Zinglei pumh)

Bethsaida Sang (Zanlei pumh)

Shalom sang

Zanlei can hmannak Bethel sang

Zinglei can hmannak (Galilee sang)

Nu le pa hna a tang i video kan rak chiah mi hi kan fa le nithumni zaan pumhnak kong a si i kan fa le ca hrim ah a bia pit tuk caah a dih tiang te nan rak ka zoh/ngeih piak nak lai Bawi Khrih min in kan i nawl hna.

🎤CBCINDY USA Mino Pumhnak Indianapolis khua ah hrambunh mi Khrihfabu tampi chungin CBCUSA ah chungtel Khrihfabu 12 kan si. Atlangpi in Mino hi minung 970 in 1,000 karlak kan um. Indy khuasa mi Khrihfabu vialte kan i pumhnak ah nan kan telpinak lai Bawipa minin kan in sawm ve hna. • Ani: June 23. 2019 (Sunday) • Acaan: 7:00 p.m. • Ahmun: CEBCINDY ⁃ Address: 5610 S Meridian St, Indianapolis IN, 46217 📍Bulletin • Caantlaitu: Salai Van Biak Mang - ZBC • Pumh ap thlacamnak: A pum mi dihlak • P&W : ICBC Praise Team - Hla fung 4 • Donnak le Thawngthanhnak: Salai Tha Cung Bik - CEBCINDY • Thawhlawm Thlacam: Salai Hlah Aung - IZBC • Solo: Mai Tial Sui Rem - CCC - Thawhlawm Khawltu: Abisak Van Hnem Sui & Rachel Sui Chin Par - CEBCINDY • Thawngtha Chimtu: Rev. Dr. Thlaawr Bawihrin - CBCUSA G.S. • P&W : ICBC Praise Team - Hla fung 1 • Thluachuah peknak: Rev. Dr. Thlaawr Bawihrin CBCUSA G.S. Bawipa sunparnak caah sidih ko hna seh🙏🏼.